2025.04.04
ЭРСДЭЛГҮЙ ИРЭЭДҮЙ ДАРХЛААЖУУЛАЛТЫН АЯН
Улаан бурхан өвчний халдварын дэгдэлт бүртгэгдсэнтэй холбогдуулан халдварын тархалтыг бууруулах, эрсдэлээс урьдчилан сэргийлэх зорилгоор аймгийн Засаг даргын захирамжаар аймгийн хэмжээнд дархлаажуулалтын 14 хоногийн аяны арга хэмжээг зохион байгуулж, дархлаажуулалтыг эрчимжүүлэн ажиллаж байна.
Аймгийн хэмжээнд дархлаажуулалтын тандалт судалгаанд тулгуурлан нийт товлолын дархлаажуулалт болон Улаанбурхан өвчний нэг, хоёрдугаар тунгийн хамрагдлыг нэмэгдүүлэх арга хэмжээг яаралтай авч хэрэгжүүлж байна. Батлагдсан тохиолдлууд нь Улаанбурхан өвчний нэгдүгээр тунг хийлгэсэн ч хоёрдугаар тундаа дутуу хамрагдсан хүүхдүүд байгаа тул, эцэг эхчүүд хүүхдийнхээ дархлаажуулалтын явцад анхаарал хандуулж, өрхийн эмнэлгүүд болон харьяа эрүүл мэндийн байгууллагуудтай хамтран ажиллаж, вакцинд хамруулах үйл ажиллагааг дэмжиж ажиллахыг уриалж байна.
Улаанбурхан өвчин нь вакцинаар сэргийлэгддэг халдварт өвчин тул багш, ажилтан, хүүхдүүдээс улаанбурхнаар өвдөөгүй, улаанбурхны эсрэг вакцинд хамрагдаагүй, вакцин хийлгэсэн эсэхээ мэдэхгүй байвал улаанбурхны эсрэг вакцинд заавал хамрагдахыг анхааруулж байна.
Иймд эцэг, эх, асран хамгаалагчид хүүхдийнхээ эрүүл мэндэд хариуцлагатай хандаж, улаанбурханы эсрэг товлолт вакцинд бүрэн хамруулсан эсэхийг тодруулах, товлолын дагуу улаанбурханы эсрэг вакцины 2 тунд хамрагдаагүй бол өрх, сумын эрүүл мэндийн төвд хандан улаанбурханы эсрэг вакцинд нөхөж хамруулна уу
Аяны хугацаанд эцэг, эх, асран хамгаалагчид хүүхдийнхээ эрүүл мэнд, ирээдүйн төлөө бусад товлолт вакцинаасаа хоцорсон, хийлгээгүй бол товлолдоо бүрэн хамруулж, эрсдэлгүй ирээдүйг хамтдаа бүтээцгээе.
