Эрчүүд өөрсдийнхөө үнэ цэнийг ойлгож, өөртөө итгэх итгэлээ дээшлүүлэх, гэр бүл, нийгэм дэх байр сууриа ухамсарлах, харилцааны ур чадвараа сайжруулах, эрүүл амьдралын хэв маягийг төлөвшүүлэхэд нь дэмжлэг үзүүлсэн “Эрүүл нийгэмд эрчүүдийн оролцоо” сэдэвт өдөрлөг боллоо. Аймгийн Хүүхэд, гэр бүлийн хөгжил, хамгааллын газраас санаачлан Цагдаагийн газартай хамтран зохион байгуулж буй тус өдөрлөгийг аймгийн ЗДТГ, Насан туршдаа суралцахуйн төвөөс дэмжин оролцож, нийгмийн салбар бүрээс 100 гаруй эрэгтэйг хамруулан боловсрол, эрүүл мэнд, сэтгэл зүй, үүрэг хариуцлагын сэдвээр мэдлэг, мэдээлэл олгосон юм.

Мөн “Өөрөө өөртөө туслах бүлэг”-ийн гишүүд идэвхтэй оролцож, туулсан амьдралын туршлага, санал бодлоо чөлөөтэй хуваалцан халуун дотно яриа өрнүүлсэн бөгөөд Говьсүмбэр аймгийн Эрэгтэйчүүдийн холбооны тэргүүн Т.Болдбаатар урилгаар оролцож, “Монгол эр хүний амин асуудал, гэр бүлийн үнэ цэн” сэдвээр илтгэл тавилаа.

“Гэр бүл эрүүл бол нийгэм эрүүл байна” гэх ойлголт илтгэгч бүрийн ярианд дурдагдаж, гэр бүлээ, үр хүүхдээ хайрласнаар нийгэмд хайрыг түгээх боломжтой гэдгийг энэ үеэр онцолж байв. Түүнчлэн Эрчүүдийн холбоо, бүлэг, клуб зэргийг байгуулж, тэдний өмнө тулгамдаж буй асуудлыг шийдэх цаг нь болсон гэдгийг өдөрлөгт оролцогчид хэлж байлаа.