Энэ сарын 5-нд аймгийн иргэдийн Төлөөлөгчдийн хурлын дарга Ж.Мөнхчулуун, аймгийн Засаг дарга С.Мөнхчулуун, Засаг даргын орлогч Ц.Ариунбаяр, Засаг даргын Тамгын газрын дарга Б.Лхагвабаатар нар Дундговь-Ус ОНӨААТҮГ-ын нөхцөл байдалтай танилцаж, газар дээр нь ажиллав. 

Энэ үеэр зуухны хүчин чадал, шугамын ачаалал, гүйцэтгэлийн чанар, инженерийн шийдэл зэргийг үзэж, холбогдох албаныхантай уулзан санал солилцлоо. 

Тус байгууллагын хуучин конторын зуухны барилгад 3.5 МВт-ын хүчин чадалтай хэвтээ болон 1.7 МВт-ын хүчин чадалтай босоо хоёр шинэ зуух, мөн 2-р зууханд адил хүчин чадал бүхий хэвтээ, босоо хоёр зуух тус тус шинээр суурилуулж байгаа юм.

Ингэснээр Дундговь-Ус ОНӨААТҮГ өмнө нь 11 МВт орчим дулааныг үйлдвэрлэж байсан бол шинэчлэл, өргөтгөлийн ажлын үр дүнд нийт 18 МВт дулаан үйлдвэрлэх хүчин чадалтай болох юм. Энэ нь аймгийн төвийн дулаан хангамжийг сайжруулж, нэмэлт хэрэглээг хангах, иргэдийг найдвартай дулаанаар хангахад чухал үүрэг гүйцэтгэнэ.

Шугамын шинэчлэлийн хүрээнд:

- Хуучин конторын орчмоос Залуус хороолол, аймгийн Засаг даргын Тамгын газар, Хүүхэд Залуучуудын хөгжлийн төв, Төв номын сан зэрэг байгууллагууд руу чиглэсэн дулааны шугамын өргөтгөл,

- 2-р зуухны хэсгээс 2-р сургуулийн урдуур татагдаж байсан 150 мм-ийн шугамыг 273 мм-ийн шугамаар солих ажлыг хийж гүйцэтгэж байна.

Мөн өргөтгөл шинэчлэлийн ажлын хүрээнд 2-р зуухны хашааг шинэчлэн засварлах ажлыг төлөвлөсөн бөгөөд энэ нь байгууламжийн аюулгүй байдал, орчны стандартын шаардлагыг хангахад чиглэж байгаа юм.