ОЮУНЫ СПОРТ: Бүгд Найрамдах Серби улсад зохион байгуулагдсан “Сурагчдын Шатрын Дэлхийн аварга” шалгаруулах тэмцээнд Монгол улсаа төлөөлөн оролцсон Шагдарсүрэнгийн Уранзаяа 9 насны охидын ангилалд “Дэлхийн дэд аварга” болж, Олон Улсын Шатрын дэд мастер цолны болзол хангажээ. Дэлхийн чихэнд Монгол улс, Төв аймаг, аав ээж, ачит багш нарынхаа нэрийг дуурсгасан бяцхан охин минь баяр хүргэе
СУРЛАГА: “Төв Математик” олимпиад 13 дахь жилдээ зохион байгуулагдав. Төв аймгийн Засаг дарга Л.Төмөрчөдөрийн ивээл дор сурагчдын математик сэтгэлгээг хөгжүүлэх, математикийн шинжлэх ухаанд шимтэн суралцах хүсэл сонирхлыг дэмжих, масс сургалтын чанарт ахиц гаргах, сурагчдын мэдлэг, чадварыг дээшлүүлэх зорилгоор "ТӨВ МАТЕМАТИК" олимпиадын 2 дугаар шатыг Батсүмбэр суманд зохион байгуулжээ. Олимпиадад 23 сумын 28 сургуулийн 2-12-р ангийн 649 суралцагч, бага ангийн болон математикийн 81 багш нийт 730 оролцогч оролцож шилдгүүдээ тодруулсан байна. Шилдгээр шалгарсан сурагчид, багш нартаа халуун баяр хүргэе
УРЛАГ: Бүжгийн спортод дуртай, хайртай, шимтэн сонирхдог хэн бүхний сэтгэлд "Хүслийн жигүүр" гэх нэр хэдийнээ хоногшиж, хэдийнээ төрөлх аймгийнхаа "Нэрийн хуудас" болжээ. Эх орны хаа нэгтээ бүжгийн тэмцээн, уралдаан зохион байгуулах агшинд "Хүслийн жигүүр" гэж сонсогдвол "Аан тийм. Төв аймгийнх" гэж хэлэхийг бүжиг сонирхогч эрхэм та сонссон нь лавтай.
“Уран хэлхээ” Олон улсын бүжгийн анхдугаар наадмын "Цэнгээнт бүжиг"-ийн төрөлд Зуунмод сумын Хүмүүн цогцолбор сургуулийн Ж.Наранбаатар багштай “Хүслийн жигүүр-8” хамтлаг "ГРАНПРИ” шагнал хүртжээ
Үе үеийн "Хүслийн жигүүр"-ийнхний үргэлжлэл, нэгэн эд эс, даль жигүүр болсон "Хүслийн жигүүр-8" хамтлагийн авьяаслаг охид, хөвгүүд, тэднийг бэлтгэж, амжилтад хөтөлдөг эрхэм багш, ард талд нь бат зогсож авьяас билгийг нь урамшуулж, дэмжиж байдаг эцэг эхчүүд, гэр бүлийнхэнд нь талархал илэрхийлье
Мөн "Уран хэлхээ" анхдугаар наадамд оролцсон “Elite dance studio”-ийн “Эрчис”-хамтлаг бага насны ангиллын Зохиомжит төрөлд “Мөнх тэнгэрийн эрчис”-бөөгийн бүжиг, Орчин үеийн бүжгийн төрөлд “Аватар” contemporary бүжгээр тус тус "ТУСГАЙ" байранд шалгарчээ.
Эрдэнэ сумын соёлын төвийн бүжгийн дугуйлангийн "ЭВ САНАА 5" хамтлагийн сурагчид "Зохиомжит" бүжгийн бага насны төрөлд "ХҮРЭЛ" медаль хүртсэн бол Батсүмбэр сумын Соёлын төвийн дэргэдэх “ТӨГС СУВД” dance team клубын 48 сурагч, Батсүмбэр сумын ЕБС-ийн 2а ангийн "Сувдан хэлхээ" хамтлаг Соёлын төвийн дарга Ц.Уранцэцэг, бүжгийн багш Б.Ууганцэцэг, бүжгийн багш Г.Нямсүрэн багшийн удирдлага дор амжилттай оролцож “Төгс сувд 1" хамтлаг "Орчин үеийн бүжиг"-ийн төрлөөр ШИЛДГИЙН ШИЛДЭГ ГРАНПРИ хүртсэн бахархам амжилтыг үзүүлсэн байна.
СПОРТ: Чөлөөт бөхийн Азийн Аварга шалгаруулах тэмцээний Монголын багийн ес дэх медалийг Олон улсын хэмжээний мастер, улсын шинэхэн аварга, залуучуудын Азийн аварга шалгаруулах тэмцээний хошой аварга Наадамбатын Батбилгүүн авчирлаа.
Тэрбээр 86 кг-ын хүрэл медалийн төлөөх барилдаанд БНХАУ-ын бөх, U-23 насны Азийн аварга Гао Наныг даралтаар цэвэр ялсан юм. Насанд хүрэгчдийн Азийн аварга шалгаруулах тэмцээнээс анхны медалиа хүртсэн Н.Батбилгүүндээ баяр хүргэе.
