Монгол Улсын Засгийн газрын 2011 оны 339-р тогтоолоор батлагдсан “Гамшгийн аюулын тухай зарлан мэдээллийн дохио дамжуулах журам”-д зааснаар “Жил бүрийн 03 дугаар сарын дөрөв дэх долоо хоногийн Пүрэв гарагийн 16 цагт улс орон даяар гамшгийн аюулын тухай зарлан мэдээллийн дохиогоор ажиллах дадлага сургууль хийж, бэлэн байдлыг ханган ажиллана” гэж заасан байдаг.
Энэ хүрээнд өнөөдөр буюу 03 дугаар сарын 27-ны өдрийн 16:00 цагт орон даяар гамшгийн аюулын тухай зарлан мэдээллийн дохионы дагуу Баянхонгор аймгийн мэргэжлийн анги албад, аж ахуйн нэгж, байгууллага, иргэдийн дунд дадлага сургуулийг Баганат талбай дээр зохион байгууллаа.
Тус дадлага, сургуулилтад Баянхонгор аймаг дахь мэргэжлийн анги албад бүрэн оролцсон бөгөөд Баянхонгор сумын Ерөнхий боловсролийн Номгон, Соого Сейко сургууль, Хүүхдийн 2-р, 7-р, 14-р цэцэрлэг, Политехникийн коллеж, Өлзийт МСҮТ, Оточ мандал ӨЭМТ-ийн ажилтан, албан хаагч, багш, сурагчид хамрагдлаа.
Тус ажиллагааны эхэнд аймгийн ИТХ-ын даргын зөвлөх Б.Батсуурь, Аймгийн Засаг даргын зөвлөх Д.Ууганцэцэг, АЗДТГ-ын ТЗУХ-ийн даргын албан үүргийг түр орлон гүйцэтгэгч Т.Эрдэнэбат, ХЭЗХ-ийн дарга Д.Сарангарав, Цэргийн штабын дарга, хурандаа Г.Нэмэхбаяр, Онцгой байдлын газрын дарга, хурандаа Д.Бат-Эрдэнэ нар энэхүү арга хэмжээнд хүүхэд, залуучууд идэвхтэй оролцож байгаад баяртай байгаагаа илэрхийлэн, дадлага сургуулилтын үйл ажиллагаанд амжилт хүсэв.
Онцгой байдлын газрын зарлан мэдээллийн төвөөс гаргах дохио нь 3 удаа дуугардаг. Үүний учир шалтгаан нь:
1 дэх түгшүүрийн дохио дуугарахад иргэн та “суу, нүүгд, хүлээ” гэсэн дүрмийг баримталж аль болох шил, цонхноос хол, бат бөх ширээн доогуур орж бие болон толгойгоо халхлан аюулгүй байдлаа хангаж түр хүлээх, хэрэв та гудамжинд явж байвал, гэрэлтүүлэг, цахилгааны тулгуур багана, өндөр барилга, байгууламж зэргээс холдож биеэ хамгаалан сууж түр хүлээх, тээврийн хэрэгслээр явж байгаа тохиолдолд замаас гарч, тээврийн хэрэгслийг унтрааж түр хүлээх;
2 дахь түгшүүрийн дохио дуугарахад анги хамт олноороо байгаа бол толгойгоо халхлан яарч сандралгүй нэгийн цуваанд орж баруун гар талаа барьж, “гүйхгүй, эргэж буцахгүй, нэгнээ түлхэхгүй” гэсэн дүрмээ баримталж, байгаа газраасаа гарч, аюулгүй талбайд цугларах;
3 дахь түгшүүрийн дохио дуугарахад та өөрийн харьяаллын засаг захиргааны нэгж болон байгууллагынхаа холбогдох албан тушаалтанд бүртгүүлж, гэр бүлийн гишүүд, анги хамт олны мэдээллийг үнэн зөв тодорхой өгнө үү гэсэн сануулгыг өгсөн дохио ажээ.
