Монгол Улсын Терроризмтой тэмцэх зөвлөлийн ажлын алба, Дорноговь аймаг дахь Терроризмтой тэмцэх салбар зөвлөлтэй хамтран 2025.06.20-ны өдөр "Үй олноор хөнөөх зэвсэг дэлгэрүүлэх болон терроризмтой тэмцэх чиглэл" сургалтыг амжилттай зохион явууллаа. 

        Тус сургалтад салбар зөвлөлийн гишүүн байгууллагын удирдлага, албан хаагчид болон аймгийн Засаг даргын Тамгын газрын төлөөллүүд зэрэг нийт 70 гаруй төрийн албан хаагчид идэвхтэй хамрагдсан бөгөөд Дорноговь аймгийн ЗДТГ-ын дарга Б.Бат-Эрдэнэ сургалтыг нээж үг хэлэв. Тэрээр Дорноговь аймаг нь газар зүйн байршлын онцлог, эдийн засгийн хурдацтай хөгжил, хилийн боомтын чадавхаараа улс орны аюулгүй байдал, урьдчилан сэргийлэх ажиллагаанд чухал байр суурь эзэлдэг. Иймд манай орон нутгийн төрийн байгууллагууд, хилийн болон тусгай чиг үүрэг бүхий албан хаагчдын мэдлэг, ур чадвар, хамтын ажиллагаа нэн чухал гэдгийг дурдлаа. 

         Энэхүү сургалт нь зөвхөн мэдээлэл дамжуулах төдий бус, харин практик аргачлал, бодит нөхцөл байдалд суурилсан туршлагаа хуваалцсан, оролцогч байгууллагуудын уялдаа холбоог бэхжүүлэх бодит алхам болох юм. 

        Мөн сургалтын төгсгөлд Дорноговь аймаг дахь салбар зөвлөлөөс Дотоодын цэргийн 834-р тусгай салбарт улсын онц чухал объектын харуул хамгаалалтад дэмжлэг үзүүлж "DJI air 3s" загварын дроныг гардуулав.