Өнөөдөр /2025.08.27/ "Дорнодын боловсрол-2025" Багш нарын бага хурлыг уламжлал болгон зохион байгуулж байна. Уг арга хэмжээнд аймгийн Засаг даргын орлогч Ч.Ганбат оролцов. 

Багш нарын бага хурлыг 2024-2025 оны хичээлийн жилийн зорилго, зорилтын хэрэгжилтийг нэгтгэн дүгнэх, Боловсролын яамнаас дэвшүүлж буй 2025-2026 оны хичээлийн жилийн зорилго, зорилт, хөтөлбөрийн шинэчлэл, багшийн мэргэжлийн тасралтгүй хөгжил, байгууллагын менежментийг сайжруулахад арга зүйн дэмжлэг үзүүлэх зорилгоор өнөөдөр зохион байгуулж байна.

Дорнод аймгийн хэмжээнд 2025-2026 оны хичээлийн жилд урьдчилсан байдлаар боловсролын салбарын 61 байгууллагад 28453 суралцагч, 2800 гаруй багш, ажилтан ажиллах юм.  

 “Сургуулийн өмнөх боловсролын шинэчилсэн хөтөлбөр”- ийг орон даяар нэвтрүүлнэ. Шинэчилсэн хөтөлбөр нь хүүхэд бүрийн хөгжил, оролцоог дэмжсэн, боловсролын бүх түвшний залгамж, уялдааг хангаж, хүртээмжийг нэмэгдүүлэхэд чиглэгдсэн байна.

Мөн 2025-2026 оны хичээлийн жилээс ерөнхий боловсролын сургуулийн III-IV ангид англи хэлний нэмэлт хөтөлбөр хэрэгжүүлж эхэлнэ.  

"Pearson English" англи хэлний цогц хөтөлбөрийг төрийн өмчийн ерөнхий боловсролын III-IV ангид үндэсний хэмжээнд нэвтрүүлснээр хувийн болон улсын сургуулийн англи хэлний сургалтын чанар адил түвшинд хүрэх, хувийн болон улсын сургуулийн сурагчдын англи хэл судалж буй ялгаатай нөхцөл буурах боломжтой.