Малчдад өвөлжөө, хаваржааныхаа 0.1 га талбайд ногоон тэжээл тариалах эрхзүйн орчныг бүрдүүлж өгснөөр тариалалтын хэмжээ эрс нэмэгдсэн. Тухайлбал, Хархорин сумын малчид 630 га талбайд малын тэжээл тариалж байгаа бөгөөд тус сумын Нарийн хүр, Онгоцон ухаа, Жалбаа, Шанх, Орхон багийн малчид 360 га тариалангийн талбайг эзэмшиж, бүлгийн зохион байгуулалтаар дөрөв дэх жилдээ малын тэжээл тариалж байгаа юм. Энэ жил сумын Орон нутгийн хөгжлийн сан, малын тоо толгойн албан татварын санхүүжилтээр малчдад 22 тонн буудай, 25.8 тонн овьёосны дэмжлэг үзүүлсэн. Мөн хашааны шон, тор, төмөр утас зэргийг нийлүүлж, тариалангийн талбайг бүрэн хашаажуулсан байна.