Хөвсгөл аймгийн Засаг дарга Л.Төмөрбаатар “Шатрын боловсрол Хөвсгөлд” төслийн багийн гишүүдийг хүлээн авч уулзлаа. Уулзалтад Төслийн багийн ахлагч Монгол Улсын гавьяат дасгалжуулагч, “Төр Монгол хөгжлийн төв”-ийн тэргүүн Ц.Батболд, Олон улсын шатрын холбооны мастер, “Стейниц Монголын шатрын академи”-ийн захирал Г.Мөнхбаяр нар оролцож, төслийн зорилго, хэрэгжилтийн талаар аймгийн удирдлага, Боловсролын газар болон Биеийн тамир, спортын газрын удирдлагуудад танилцуулга мэдээлэл хийлээ. “Шатрын боловсрол Хөвсгөлд” төсөл нь хүүхэд, өсвөр үеийнхний оюуны хөгжлийг дэмжих зорилготой бөгөөд аймгийн бүх суманд шатрын боловсролыг үе шаттайгаар түгээн дэлгэрүүлэхээр төлөвлөжээ. Төслийн хүрээнд сум бүрт мэргэшсэн шатрын багш бэлтгэж, тэдгээр багш нараар дамжуулан ерөнхий боловсролын сургуулийн сурагчдад шатрын хичээл заах, сургалтын нэгдсэн арга зүйг бүрдүүлэх, багш нарын ур чадварыг дээшлүүлэх зэрэг ажлуудыг хийж хэрэгжүүлэх юм.
